Foros de la Plataforma por una Vivienda Digna

[Bersuit]

Sacado do discurso de presentación do candidato Alberto Núñez Feijoo a Presidente da Xunta de Galicia:

A política de Vivenda do goberno, como xa se avanzou, atenderá a un triplo obxectivo:

- Axudar a resolver os problemas que as familias e os mozos teñen para acceder a unha vivenda;
- Contribuír á reactivación dun sector do que depende o traballo de moitas persoas en Galicia;
- E mellorar o stock de vivendas de Galicia, non só en cantidade, senón tamén en calidade.

Para elo, ademais das iniciativas fiscais xa expostas o goberno impulsará outras medidas entre as que quero destacar as seguintes:

- Impulsaremos a sinatura dun Acordo entre a administración e todos os actores do sector inmobiliario (promotores, entidades de crédito, colexios de notarios e rexistradores da propiedade), que propicie a saída ao mercado do stock de vivendas existente en Galicia no curto prazo, a través de diferentes fórmulas de acceso, e cun compromiso de prezos máximos.
- Paralelamente, investirase na adquisición de vivendas a prezo taxado co mesmo obxectivo de reducir o stock de pisos baleiros.
- Impulsaremos programas específicos de vivenda en aluguer, de vivenda en aluguer con opción de compra, e impulsaremos a construcción de VPO alí onde a demanda o faga racionalmente necesario.


Accións fiscais referidas (todas orientadas á compra, como non):

- Reformaremos o Imposto de Transmisións Patrimoniais e Actos Xurídicos Documentados, para rebaixar ás familias numerosas (con carácter permanente) e aos menores de 35 anos (nos próximos tres anos) que adquiran a súa vivenda habitual os tipos impositivos do 7% ao 4% no Imposto de Transmisións Patrimoniais (un 43%); e do 0,75% ao 0,3% (un 50% menos) no Imposto sobre Actos Xurídicos Documentados.

Podo anunciarlles que a última medida exposta será unha das primeiras que aprobe o goberno. Non ten senso que hoxe, co stock de vivendas baleiras que hai en Galicia, unha familia numerosa ou un mozo pague en Galicia 6.800€ máis en impostos por adquirir unha vivenda media (180.000€) que na rexión de Murcia.

A miña crítica:

De novo un enfoque económico (sistema produtivo) e non social (dereito). E por suposto, aposta preferente por solucionar o problema do acceso a través da compra e non do alugueiro. Que hai do de converxer con Europa?: en Alemaña a metade de vivendas son de alugueiro, en Francia o parque de vivendas público nesta modalidade é do 20%... En fin, e non será porque alí non haxa tamén unha "cultura da propiedade privada".

Preocúpame o enfoque exclusivo cara ás familias e os mozos; como se os separados, solteiros e xubilados non tivesen problemas coa vivenda. Este non é un problema de idade ou de situación civil senón de ingresos. Sorpréndeme á importancia cuasi-eclesial que lle da ás familias; sobre todo nunha sociedade cambiante na que o concepto familia queda anacrónico e vai sendo substituído por unidades convivenciais, grazas en parte a unha pésima xestión da política de vivenda sacrificada en aras dun crecemento económico non sostíbel a base de endebedamento perpetuo. Por outra banda, non me queda moi claro esa combinación de apostar polo I+D+I e o valor engadido no traballo e despois volver co de reactivar unha burbulla pinchada tan tecnolóxicamente punteira como é a do ladrillo.
_________________
Saudiños,
B.
--
Si no sabes a dónde quieres ir, no tiene importancia cuál
de los caminos tomes.

[Buran]

[Bersuit]